Forcat e RENEA kanë zhvilluar një operacion në lidhje me vrasjen e Gentian Qarrit, ekzekutimi i të cilit ndodhi mbrëmjen e 6 shkurtit 2021 në Vlorë.
Sipas hetimeve, autorët kanë pritur për rreth 10 minuta në rrugë derisa ai të dilte nga ambientet e një gomisterie pranë vendit të ngjarjes dhe të drejtohej drejt një lokali.
Pamjet filmike të sekuestruara nga prokuroria e Vlorë tregojnë se automjeti tip Toyota Yaris, ku ndodheshin autorët, ka lëvizur pak çaste para se të qëllohej me armë. Në atë moment pranë vendit të ngjarjes ka kaluar një makinë policie, çka i ka detyruar autorët të largohen për pak çaste dhe më pas të rikthehen sërish.
Ata kanë pritur derisa të dilte objektivi i tyre, Gentian Qarri, i njohur në Vlorë edhe me nofkën “Gëçe”. Ndaj tij është qëlluar rreth 20 herë, ku 6 plumba e kanë goditur në trup.
Nga pamjet filmike të administruara nga policia dyshohet se autorët kanë qëlluar me automatik nga brenda automjetit tip Toyota Yaris, i cili ishte në lëvizje në momentin e sulmit.
Gentian Qarri ishte kthyer prej rreth tre vitesh në Vlorë, pasi më herët kishte vuajtur dënimin në Itali me 11 vite burg për akuzën e trafikut të drogës.
