Zyrtari i lartë i Kremlinit, Dmitry Medvedev, sulmoi ashpër Presidentin Donald Trump për luftën në Iran, duke ironizuar dëshirën e tij për të fituar Çmimin Nobel për Paqen dhe duke e kritikuar ashpër NATO-n për reagimin e saj.
Turqia, një aleate e NATO-s, tha të mërkurën se rrëzoi një raketë balistike nga Irani që po shkonte drejt hapësirës së saj ajrore. Ushtria iraniane ka mohuar se ka qëlluar një raketë drejt Turqisë.
“NATO është e çmendur!”, shkroi Medevdev, i cili është zëvendës i Presidentit rus Vladimir Putin në Këshillin e Sigurisë së Kremlinit dhe vetë ish-president dhe kryeministër i Rusisë, në një postim në rrjetet sociale të enjten.
“Së pari, SHBA-të vrasin udhëheqësin e Iranit dhe fillojnë një luftë në Lindjen e Mesme. Më pas, idiotët e NATO-s të udhëhequr nga ‘djali’ servil i Trumpit, Rutte, mendojnë të përdorin Nenin 5.”
“Po sikur ta nominosh Presidentin Trump për Çmimin Nobel për Paqen për shkak se ka filluar një luftë të madhe, apo jo? Orwell kishte të drejtë: lufta është paqe!”
Regjimi iranian ishte një nga aleatët kryesorë të Rusisë. Rusia ka kritikuar ashpër sulmet e SHBA-së dhe Izraelit dhe ka bërë thirrje për rifillimin e bisedimeve diplomatike mbi çështjen bërthamore.
Aleatët e NATO-s, përfshirë Mbretërinë e Bashkuar dhe Francën, kishin thënë se do të ndihmonin në mbrojtjen e partnerëve në Lindjen e Mesme nga sulmet iraniane dhe dërguan anijet e tyre luftarake në Lindjen e Mesme.
Por deri më tani ata kanë refuzuar të përfshihen drejtpërdrejt në luftën SHBA-Izrael kundër Iranit.
Rutte foli për raketën e rrëzuar nga Turqia në një intervistë me Reuters të enjten në mëngjes.
“Ne e dënojmë qartë”, tha Rutte.
“Ishte qartë një incident serioz,” tha Rutte.
Por ai shtoi: “Neni 5 mendoj se nuk është në rregull këtu, dhe askush nuk po flet për Nenin 5.”
