Këngëtares së njohur shqiptare, Soni Malaj i është ndaluar hyrja në Zvicër për një periudhë 2-vjeçare, pas problemeve ligjore që lidhen me një vizitë të saj në pranverën e vitit 2024. Vendimi është konfirmuar nga Gjykata Federale Administrative. Çështja lidhet me ngjarjen e prillit 2024, kur këngëtarja udhëtoi drejt Zvicrës dhe një ditë më pas u kontrollua dhe u arrestua në zonën VIP dhe prapa skenës së “Boleros Club”.
Kontrolli u zhvillua në kuadër të një operacioni të gjerë të policisë së kantonit të Zyrihut, gjatë një feste me rastin e Bajramit. Aty pritej të performonin disa artistë shqiptarë. Sipas autoriteteve, disa prej tyre nuk dispononin lejet e nevojshme të punës. Prokuroria lëshoi menjëherë një dekret akuzë, duke e shpallur Malajn fajtore për hyrje të qëllimshme të paligjshme dhe ushtrim aktiviteti fitimprurës pa leje. Ajo u dënua me një gjobë me kusht prej 70 ditësh me nga 30 franga secila, si dhe me një gjobë shtesë prej 400 frangash. Më pas, këngëtarja tërhoqi ankesën, duke e bërë vendimin përfundimtar.
Njëkohësisht, Sekretariati Shtetëror për Migracionin vendosi ndalim-hyrjeje dyvjeçar në Zvicër dhe Lihtenshtejn, si dhe e regjistroi emrin e saj në sistemin e informacionit “Schengen” për të mos i lejuar hyrjen. Kjo do ta pengonte këngëtaren që të udhëtonte në shumicën e vendeve europiane. Malaj kundërshtoi vendimin, duke pretenduar se udhëtimi kishte qenë privat, se nuk kishte planifikuar të performonte dhe se emri i saj ishte vendosur në fletëpalosje vetëm për qëllime promovuese.
Ajo theksoi gjithashtu se vajza e saj e mitur jeton me të atin në Itali. Ankesa u pranua pjesërisht dhe autoritetet hoqën emrin e saj nga sistemi Schengen, por Gjykata Federale Administrative konfirmoi ndalimin e hyrjes në Zvicër, duke e konsideruar masën proporcionale. Sipas gjykatës, shpjegimet e artistes ishin të paqarta, ndërsa fakti që biletat e avionit ishin paguar nga menaxheri dhe se emri i saj figuronte në materialet promovuese binte ndesh me pretendimin për një vizitë thjesht private. Falë pranimit të pjesshëm të ankesës, Soni Malaj do të paguajë vetëm një pjesë të shpenzimeve gjyqësore dhe do të përfitojë 900 franga zvicerane si kompensim për asistencën ligjore.
