Ministri pakistanez i Mbrojtjes, Khawaja Asif, i shpalli “luftë të hapur” qeverisë de facto talebane në Afganistan, pasi dy vendet fqinje të Azisë Juglindore shkëmbyen sulme vdekjeprurëse.
“Durimi ynë ka mbaruar. Tani ka një luftë të hapur midis nesh dhe jush “, tha Khawaja në platformën X, duke sinjalizuar një përshkallëzim të ndjeshëm të krizës mes Islamabadit dhe Kabulit.
Në reagimin e tij, ministri pakistanez akuzoi Talibanët se, pas tërheqjes së forcave të NATO nga Afganistani, nuk garantuan paqe dhe stabilitet, por e kthyen vendin në strehë për grupe terroriste nga mbarë bota.
Ai pretendoi gjithashtu se qeveria de facto në Kabul ka privuar qytetarët nga të drejtat themelore, përfshirë të drejtat e grave, dhe ka vepruar në interes të Indisë.
Ndërkohë, kryeministri i Pakistanit, Shahbaz Sharif deklaroi se forcat e armatosura të vendit kanë “kapacitet të plotë” për të përballuar dhe “shkatërruar” çdo kërcënim.
“Forcat tona të armatosura kanë aftësi të plotë për të shtypur çdo ambicie agresive”, thuhet në deklaratën e publikuar nga qeveria pakistaneze, duke shtuar se “i gjithë kombi qëndron në krah të forcave të armatosura”.
