Investimi, detajet financiare të të cilit nuk janë bërë publike, është pjesë e CR7 SA, kompania mëmë përmes së cilës ish-lojtari i Real Madridit dhe Manchester Unitedit po forcon praninë e tij në biznesin sportiv.
Cristiano Ronaldo ka njoftuar zyrtarisht blerjen e 25% të aksioneve të UD Almería, skuadër që militon në Segunda División dhe që aktualisht ndodhet në vendin e tretë, vetëm një dhe dy pikë larg kryesuesve Racing Santander dhe Castellón. Kjo do të thotë se Almería ka shanse reale për t’u ngjitur në La Liga.
Lidhur me këtë investim, Cristiano deklaroi:
“Gjithmonë kam pasur ambicien të kontribuoj në futboll edhe përtej fushës. UD Almería është një klub me baza solide dhe me potencial të qartë rritjeje. Jam vërtet i emocionuar të punoj së bashku me drejtuesit për të mbështetur fazën e ardhshme të zhvillimit të klubit.”
Sipas një komunikate të publikuar nga ylli portugez, investimi do të integrohet në CR7 Sports Investments, një degë e re e krijuar nga CR7 SA, e themeluar për të konsoliduar dhe menaxhuar investimet e Cristiano Ronaldos në sektorin e sportit.
Në deklaratë theksohet se kjo strukturë do të shërbejë si mjet për vlerësimin dhe realizimin e mundësive strategjike në fushën e sporteve profesionale.
Nga ana tjetër, Mohamed Al Khereiji, presidenti i Almerías, konfirmoi marrëveshjen dhe u shpreh:
“Jemi shumë të lumtur që Cristiano ka zgjedhur klubin tonë për të investuar. Ai konsiderohet lojtari më i mirë i të gjitha kohërave, i njeh shumë mirë kampionatet spanjolle dhe e kupton potencialin e asaj që po ndërtojmë këtu, si te skuadra ashtu edhe te akademia.”
Ditët e fundit, në Almería kishin qarkulluar zëra se ylli portugez mund ta mbyllte karrierën e tij, pas të 40-ave, pikërisht te kjo skuadër. Në realitet, ajo që po përgatitej ishte kjo blerje aksionesh — investimi i parë i madh i Cristiano Ronaldos në një klub spanjoll.
