Përplasjet mes banorëve të Rrjollit dhe policisë sa vijnë dhe bëhen më të ashpra dhe shkak për këtë prej gati 1 muaj është bërë resorti që ndërtuesi dhe botuesi Bashkim Ulaj po ndërton në zonë. Banorët pretendojnë se toka është pronë e tyre dhe se dokumentet janë falsifikuar dhe për këtë është ende i hapur një proces i gjatë gjyqësor.
Banorët tentojnë çdo ditë për të penguar punimet e kompanisë “Gener 2” të Bashkim Ulajt. Ky i fundit për të ruajtur punonjësit por dhe për të garantuar vijimin e punës në kantier, ka punësuar kompaninë private “Breçani Security”, të cilët janë përplasur fizikisht me banorët. Siç shihet nga pamjet, një prej punonjësve të sigurisë private të punësuar nga Ulaj, ka qëlluar me grusht një djalë të ri, i cili proteston për të mbrojtur tokën e tij. Ky moment ka tensionuar më tej situatën që ka çuar dhe në përplasjen e banorëve me policinë. Efektivët kanë shoqëruar në komisariat 6 banorë të Rrjollit, mes tyre dhe një vajzë.
Sot në Rrjoll kanë shkuar në mbështetje të banorëve dhe deputetët e Partisë Demokratike, Bardh Spahia dhe Luçiano Boçi.
Banorët e Rrjollit zotohen për të mos hequr dorë nga prona e tyre. Disa ditë më parë, familjes Malaj i është njohur e drejta e pronësisë mbi një sipërfaqe prej 20,700 m², rreth 2.1 hektarë, në fshatin Rrjoll në Velipojë, në një zonë kufitare me vendin po ndërtohet resorti “Blue Borgo”.
Vendimi u dha nga Gjykata e Apelit të Juridiksionit të Përgjithshëm në Tiranë, e cila pranoi pjesërisht padinë e Nikollë Malajt kundër Agjencisë së Trajtimit të Pronave, një proces gjyqësor i nisur që në vitin 2018 dhe që zgjati 8 vite.
Duke qenë se beteja është fituar për 2.1 hektarë, banorët shpresojnë se do të merret një vendim pozitiv nga Gjykata edhe për zonën ku Ulaj po ndërton. Kjo pasi sipas tyre, Fatmir Shpellzaj, ish-drejtor kadastre dhe eksponent i Partisë së Lirisë, i cili pretendon se zotëron tokën ku Ulaj po ndërton, ka falsifikuar dokumentet për marrjen e saj në pronësi.
Punimet për ndërtimin e “Blu Borgo”-s në një sipërfaqe prej 146 hektarësh, Bashkim Ulaj i nisi në fillim të shkurtit pasi mori lejen e ndërtimit. Projekti parashikon 33 struktura akomoduese dhe shërbimi, me objekte nga 3 deri në 10 kate mbi tokë dhe një kat nëntokë. Subjekti zhvillues është shoqëria “ABA Blue Borgo”, me statusin e investitorit strategjik.
