Më 24 shkurt, vendet evropiane riafirmuan mbështetjen për Ukrainën dhe solidaritetin me popullin e saj, në katërvjetorin e nisjes së pushtimit të plotë nga Rusia.
Liderë nga e gjithë Evropa vizituan Kievin për të shprehur përkrahjen për përpjekjet e Ukrainës dhe për të nderuar ushtarët e rënë në luftë.
Mes tyre ishte edhe presidentja e Komisioni Evropian, Ursula von der Leyen, e cila theksoi se qëllimi i vizitës ishte të riafirmonte se Evropa qëndron e palëkundur pranë Ukrainës, si në aspektin financiar ashtu edhe në atë ushtarak.
Edhe presidenti francez Emmanuel Macron shprehu solidaritet me rreth 15 mijë civilët ukrainas të vrarë që nga fillimi i konfliktit. Ai konfirmoi mbështetjen për Ukrainën, por njëkohësisht u shpreh i hapur për bisedime direkte me presidentin rus Vladimir Putin.
Megjithatë, në Francë vihet re një rënie e entuziazmit publik: 47% e qytetarëve mbështesin furnizimin me armë, ndërsa 39% shprehen kundër.
Në Spanjë, sondazhet tregojnë një klimë më pesimiste për të ardhmen e luftës. Shumica e spanjollëve besojnë se Ukraina nuk do të arrijë të rikuperojë territoret e pushtuara në rast të një marrëveshjeje paqeje.
Edhe pse 75% mbështesin ndihmën ushtarake, ekziston shqetësimi se konflikti mund të përhapet në pjesë të tjera të Evropës Lindore.
Në Portugali, rreth gjysma e të anketuarve përkrahin financimin e gjerë të Bashkimit Evropian për Ukrainën, ndërsa 61% mbështesin pjesëmarrjen e trupave portugeze në misione paqeje pas përfundimit të luftës.
Ndërkohë, në Gjermani, një sondazh i fundit tregon se 52% e qytetarëve mbështesin rritjen e ndihmës ushtarake dhe financiare nga Perëndimi për Ukrainën.
Këto të dhëna dëshmojnë se, megjithëse mbështetja evropiane për Ukrainën mbetet e fortë në nivel politik, në opinionin publik po shtohen shqetësimet për zgjatjen e luftës dhe pasojat e saj afatgjata për kontinentin.
