Barcelona përfitoi në maksimum nga gabimi i Real Madridit në Pamplona, duke mposhtur Levanten me rezultatin 3-0 në një ndeshje që nuk ishte spektakolare, por që shënoi një kthesë të rëndësishme për skuadrën katalanase. Fitorja i rikthen blaugranët në krye të tabelës dhe u jep qetësi për javën në vazhdim, teksa objektivi në Champions League është siguruar tashmë me kualifikimin mes tetë më të mirave.
Pas dy humbjeve që kishin nxjerrë në pah dobësitë defensive dhe mungesën e balancës në lojë, trajneri Hansi Flick ndërhyri në formacion. Ai rreshtoi De Jong përkrah Bernal në mesfushë për të forcuar kontrollin dhe aktivizoi nga minuta e parë Lewandowskin dhe Cancelon, duke kërkuar më shumë lidership në fushë. Lëvizjet rezultuan të suksesshme, me Cancelon dhe Bernalin ndër më të mirët në fushë.
Vetëm katër minuta nga starti, një krosim i saktë i Cancelos u shndërrua në gol nga Bernal, i cili po konsolidon vendin e tij në formacionin titullar. Në minutën e 32-të, sërish Cancelo asistoi për De Jong, që dyfishoi shifrat. Megjithatë, pavarësisht epërsisë, Barcelona vazhdoi të shfaqte luhatje në prapavijë, duke i dhënë disa mundësi të rrezikshme kundërshtarit.
Levante, e drejtuar nga Luis Castro, u mbrojt me pesë lojtarë dhe tentoi të godiste në kundërsulm, por mungesa e efikasitetit në fazën sulmuese e penalizoi. Lamine Yamal u mbajt nën kontroll, ndërsa Dani Olmo pati një pjesë të parë të vakët.
Në pjesën e dytë, Flick hodhi në fushë Pedrin, Ferminin dhe Ferran Torresin, duke freskuar lojën. Edhe pse ritmi i takimit ra, Barcelona vazhdoi të ushtrojë presion me goditje këndi të njëpasnjëshme. Pikërisht nga një skemë e tillë, Fermin realizoi një supergol nga jashtë zone, me topin që pasi preku shtyllën përfundoi në rrjetë për 3-0.
Në fund, Barcelona e mbylli ndeshjen pa shumë bujë, por me efikasitet, duke kapitalizuar maksimalisht gabimin e rivalit direkt për titull. Megjithatë, përballë kundërshtarëve më të fortë, katalanasit do të duhet të përmirësojnë ndjeshëm sigurinë në mbrojtje.
