Mesi i shkurtit iku dhe zbatimi i ligjit për rivlerësimin e pasurive të paluajtshme mbetet në letër!
Mungesa e akteve nënligjore pamundëson zbatimin e ligjit të shumëpritur dhe ka krijuar një ngërç në tregun imobiliar, sipas ekspertëve. E për këtë pritet firma e ministrit të Financave.
Agjentët imobiliarë raportojnë se prej muajsh kontratat janë paralizuar, ndërsa arsyet e vonesës mbeten të paqarta.
Gjithashtu, zbatimi i ligjit pritet të nisë vetëm pas miratimit të çmimeve të reja të referencës, të cilat do të shërbejnë si udhëzues në praktikë për procesin e rivlerësimit.
Sipas agjentëve, përveç kësaj vonese, në disa qarqe janë hasur edhe probleme me funksionimin e zyrave të kadastrës.
Pasiguria për afatet dhe procedurat ka ndikuar drejtpërdrejt në uljen e ritmit të transaksioneve, sipas tyre.
Agjentët kujtojnë se vonesa të ngjashme kanë ndodhur edhe në vite të tjera, por kërkojnë që këtë herë procesi të trajtohet me prioritet nga ligjvënësit dhe institucionet përgjegjëse.
Në pritje të kësaj procedure janë dhjetëra mijëra pronarë apartamentesh, të cilët synojnë të përfitojnë nga ulja e tatimit për rivlerësimin e pronës në 5%, nga 15% që është aktualisht./oranews
