Ukraina ka nevojë urgjente për fonde dhe pritej që t’i merrte së shpejti nga Bashkimi Evropian. Javën e kaluar, Parlamenti Evropian dha miratimin për kredinë, për të cilën BE-ja kishte rënë dakord më herët. Por tani Hungaria po e bllokon marrëveshjen.
“Po bllokojmë kredinë prej 90 miliardë eurosh të BE-së për Ukrainën derisa të rifillojë tranziti i naftës drejt Hungarisë përmes tubacionit Druzhba”, shkroi ministri i Jashtëm hungarez, Péter Szijjártó, në platformën X.
Tubacioni Druzhba ka ndalur funksionimin që nga fundi i janarit. Ukraina thotë se kjo ka ndodhur si pasojë e bombardimeve ruse, duke përmendur dëme nga një sulm rus pranë qytetit Brodi, në fund të janarit.
Hungaria dhe Sllovakia akuzojnë udhëheqjen ukrainase se po pengon qëllimisht rifillimin e furnizimeve. Furnizimi me naftë i të dy vendeve varet në masë të madhe nga ky tubacion.
Ministrja e Ekonomisë së Sllovakisë, Denisa Saková, deklaroi para pak ditësh se Ukraina e ka shtyrë rifillimin e dërgesave të naftës deri më 24 shkurt. Fillimisht ato ishin planifikuar të rifillonin këtë të shtunë. Nga këndvështrimi ukrainas, blerja e gazit dhe naftës ruse nga Sllovakia dhe Hungaria kontribuon në financimin e luftës së Moskës.
“Sa kohë që Ukraina bllokon tubacionin Druzhba, Hungaria do të bllokojë kredinë ushtarake prej 90 miliardë eurosh”, shkroi kryeministri hungarez, Viktor Orbán, në Facebook. “Nuk do të na ushtrojnë presion”,shtoi ai.
Ministri i Jashtëm hungarez akuzoi Ukrainën për shantazh. Ai pretendoi se vendi po bashkëpunon me opozitën hungareze dhe me Brukselin për të rritur çmimet e karburanteve para zgjedhjeve në Hungari dhe për të ndikuar në rezultatin e tyre.
Zgjedhjet parlamentare janë planifikuar për 18 prill dhe, për herë të parë pas 16 vitesh, Viktor Orbán përballet me mundësinë e humbjes së tyre.
Miratimi konsiderohej procedurë formale
BE-ja kishte arritur tashmë një marrëveshje për t’i dhënë Ukrainës deri në 90 miliardë euro përgjatë dy viteve. Krerët e shteteve dhe qeverive ranë dakord fillimisht në dhjetor, ndërsa Parlamenti Europian dha gjithashtu miratimin javën e kaluar. Tani kërkohet vetëm miratimi i Këshillit të Shteteve Anëtare për të disbursuar këstet e para të fondeve. Kjo konsiderohej si një procedurë formale. Megjithatë, votimi i nevojshëm tashmë është shtyrë.
Një zëdhënës i KE iu referua vendimit unanim të samitit të BE-së dhe deklaroi, në përgjigje të një pyetjeje: “Presim nga të gjitha shtetet anëtare që ta respektojnë këtë marrëveshje politike në prag të miratimit përfundimtar të kredisë”.
Fondet synojnë të mbulojnë nevojat më urgjente financiare të Ukrainës deri në fund të vitit 2027 dhe të mundësojnë vazhdimin e përpjekjeve të saj kundër Rusisë. Sipas vendimit të BE-së, 60 miliardë euro janë të destinuara për mbrojtjen, ndërsa pjesa tjetër do të shërbejë si ndihmë buxhetore për Kievin.
