Rruga nacionale Librazhd-Prrënjas ka pësuar çarje të rëndësishme dhe cedim të asfaltit pranë zonës së njohur si “Arrat e Gurrës” pas një rrëshqitje masive. Fenomeni natyror ka shpërthyer si pasojë e gërryerjes në anën e lumit Shkumbin, e cila ka vazhduar të shkaktojë dëme edhe këtë të shtunë.
Për shkak të rrezikut të madh për sigurinë, Autoriteti Rrugor Shqiptar (ARRSH) ka njoftuar se do të ndalohet qarkullimi i mjeteve të tonazhit të rëndë dhe i autobusëve në këtë segment të rrugës deri në një njoftim të dytë. Kjo masë është marrë për të garantuar sigurinë e qarkullimit dhe për të parandaluar aksidentet e mundshme në këtë zonë të rrezikshme.
Njoftimi i plotë:
Në vijim të njoftimit të mëparshëm për aksin Librazhd-Pogradec vendi i quajtur Arrat e Gurrës, ju informojmë se situata në vendin e rrëshqitjes është agravuar ndjeshëm gjatë orëve të fundit.
Pas vlerësimit në terren, Autoriteti Rrugor Shqiptar, në koordinim me Policinë e Shtetit, njofton se:
Do të ndalohet qarkullimi i mjeteve të tonazhit të rëndë dhe i autobusëve në këtë segment, deri në një njoftim të dytë, për arsye sigurie.
U bëjmë thirrje drejtuesve të mjeteve të tonazhit të rëndë dhe operatorëve të transportit të shmangin këtë aks dhe të përdorin rrugë alternative, deri në stabilizimin e plotë të situatës.
Kërkojmë mirëkuptimin e të gjithë përdoruesve të rrugës. Çdo masë e marrë ka si qëllim të vetëm garantimin e sigurisë së jetës dhe parandalimin e incidenteve të mundshme.
