Hashim Thaçi, njeriu që 18 vjet më parë lexoi fjalimin për aktin historik të shpalljes së Pavarësisë së Kosovës, sot qëndron përballë Dhomave të Specializuara të Kosovës në Hagë (DhSK), për të mbrojtur me një fjalim të fuqishëm luftën e drejtë dhe sakrificën e Ushtrisë Çlirimtare të Kosovës (UÇK).
Në këtë moment me peshë historike, ish-presidenti po i drejtohet trupit gjykues, opinionit ndërkombëtar dhe popullit të Kosovës, me një mesazh të qartë për kauzën çlirimtare, rrugëtimin e dhimbshëm drejt shtetësisë dhe për të vërtetën e luftës që ndryshoi përgjithmonë fatin e vendit.
Në deklaratën e tij para trupit gjykues, Thaçi rikujtoi se ishte ndjekur dhe dënuar në mungesë nga regjimi i Sllobodan Millosheviçit, me akuzën për shkelje të ligjeve që ai i cilësoi si diskriminuese. Sipas tij, i njëjti regjim kishte dënuar në mungesë edhe liderë perëndimorë si Bill Clinton, Madeleine Albright, Tony Blair, Gerhard Schröder, Jacques Chirac dhe Javier Solana.
Thaçi theksoi se vendimi për t’u kthyer në Kosovë në pranverën e vitit 1998 ishte personal dhe i motivuar nga situata në terren.
Hashim Thaçi: Duke parë masakrat ndaj popullit tim, nuk mund të qëndroja indiferent. Vendosa të kthehem në Kosovë. Ky ishte vendimi im personal. Nuk mund të qëndroja anash teksa familja dhe populli im përballeshin me shfarosje. Bëra atë që do bënte secili prej jush nëse populli juaj do përjetonte atë që përjetoi populli im. Për këtë jam shumë krenar dhe nuk i bie pishman asnjëherë
Sipas Thaçit, gjatë luftës ai nuk kishte siguri për jetën e tij dhe as për fatin e familjes.
Hashm Thaçi: Nuk u ktheva për kontroll dhe pushtet, por për liri dhe paqe Millosheviçi nisi luftën në Kosovë, ndërsa ne po vetëmbroheshim. Luftën mund ta përfundonte vetëm NATO dhe ashtu ndodhi. I vetmi kundërshtar ii mi, i Kosovës dhe i botës demokratike ishte Millosheviç. Është e rëndë ta dëgjosh këtë akuzë veçanërisht kur gjatë luftës unë nuk e dija nëse do të isha i gjallë apo jo.
