Një krizë e papritur ka shpërthyer në setin e serialit të ri, ku protagonistët Afra Saraçoğlu dhe Kenan İmirzalıoğlu janë përfshirë në një konflikt rreth një skene puthjeje. Diferenca e theksuar e moshës mes tyre, 28 vjeçe ajo dhe 51 vjeç ai, thuhet se ka qenë një nga elementët që ka nxitur diskutime në prapaskenë. Seriali, që nisi sezonin me shumë bujë, tashmë po kthehet në qendër të vëmendjes edhe për zhvillimet jashtë ekranit.
Afra Saraçoğlu u bë e njohur për publikun shqiptar me rolin e “Sejran” në serialin “Çapkëni i Pasur” të transmetuar në Tv Klan. Ndërsa Kenan İmirzalıoğlu ka lënë gjurmë të thella me interpretimin e tij në rolin e “Ezelit”, serial që gjithashtu u transmetua nga Tv Klan dhe pushtoi audiencën. Kombinimi i tyre në një projekt të përbashkët ngjalli menjëherë kureshtjen e fansave, të cilët e pritën me padurim këtë bashkëpunim.
Megjithatë, tensionet mes tyre kanë arritur kulmin. Burime nga seti raportojnë se gjatë xhirimit të një skene puthjeje, Afra Saraçoğlu ka refuzuar kategorikisht të puthë Kenan İmirzalıoğlu, duke shkaktuar një ndalesë të menjëhershme të xhirimeve. Sipas informacioneve, aktorja është shprehur se nuk ndihej komode me mënyrën se si ishte ndërtuar skena dhe se ajo nuk ishte në përputhje me kufijtë profesionalë që dëshiron të respektojë.
