Në edicionin e 19-të të Sony World Photography Awards, ngjyrat, teksturat, energjia dhe lëvizja kanë qenë elementët dominues mes fotografive fituese.
Gjyqtarja Ruby Rees-Sheridan, kuratore asistente e fotografisë në National Portrait Gallery, ka përzgjedhur imazhet më të spikatura të vitit në dhjetë kategori:
Arkitekturë, Kreativitet, Peizazh, Lifestyle, Lëvizje, Bota Natyrore & Kafshët e Egra, Objekt, Portret, Fotografi Rruge dhe Udhëtim.
Sipas organizatorëve, çdo fotografi është vlerësuar për “fuqinë për të ngjallur kuriozitet, për të ndezur imagjinatën dhe për të zbuluar një narrativë më të gjerë”. Në total, konkursi ka pranuar mbi 430 mijë aplikime nga më shumë se 200 vende të botës.
Fituesi i çmimit “Fotografi i Vitit” do të shpallet më 16 prill, gjatë një ceremonie gala në Londër. Ai do të marrë një shpërblim prej 4 mijë eurosh, si dhe një gamë pajisjesh fotografike nga Sony.
Për të shënuar këtë event, një përzgjedhje e imazheve fituese dhe atyre të përfshira në listën e ngushtë do të ekspozohet në Somerset House nga 17 prilli deri më 4 maj 2026, përpara se ekspozita të udhëtojë në vende të tjera.
Kategoritë e konkurrimit përfshijnë një gamë të gjerë temash dhe stilesh, duke ofruar një panoramë të pasur të fotografisë bashkëkohore. Nga natyra te jeta urbane, nga arkitektura te arti i rrugës, konkursi reflekton kreativitetin dhe talentin e fotografëve nga e gjithë bota.
Ky garim mbetet një nga platformat më të rëndësishme ndërkombëtare për promovimin e fotografisë si formë arti, duke inkurajuar rrëfimin e historive përmes imazhit dhe duke sjellë në vëmendje kultura, realitete dhe perspektiva të ndryshme globale.
