Dega e Doganës Durrës ka arritur që të bllokojë një sasi të konsiderueshme produktesh ushqimore, të cilat e kishin kaluar afatin e përdorimit.
Përmes një njoftimi zyrtar është bërë me dije se punonjësit e kësaj dege doganore kanë arritur që të konstatojnë dhe bllokojnë 2.500 kilogramë miell orizi me datë skadence 1 prill 2025, si dhe 5.150 kilogramë miell për pica me datë skadence 7 prill 2025.
Në total, bëhet fjalë për 7.650 kilogramë miell që rezultonte jashtë afatit të përdorimit, referuar datave të skadencës të shënuara në produkt.
Në bashkëpunim me strukturat e Autoritetet Kombëtar të Ushqimit, Dogana e Durrësit ka nisur procedurat përkatëse të cilat parashikohen nga ligji, deri në konfiskimin total të mallit.
“Dogana e Durrësit ka nisur procedurat, në bashkëpunim me strukturat e Autoritetit Kombëtar të Ushqimit, në përmbushje të kompetencave përkatëse, deri në asgjësimin e mallit.
Drejtoria e Përgjithshme e Doganave shpreh angazhimin maksimal për zbatimin e ligjshmërisë dhe nxit operatorët ekonomikë për respektimin e detyrimeve, me qëllim garantimin e sigurisë dhe mbrojtjes së shtetasve”, thuhet ndër të tjera një njoftimin e berë.
