Këtë të hënë, Asambleja Zgjedhore e Federatës Shqiptare të Futbollit zgjodhi Armand Duka president për një mandat tjetër katërvjeçar. Gjatë kësaj asambleje, pranishëm ishte edhe Gabriele Gravina, presidenti i Federatës Italiane të Futbollit, i cili mbajti një fjalim përshëndetës. Ai theksoi progresin e bërë nga futbolli shqiptar duke e quajtur një moment të rëndësishëm që lidh kulturat dhe identitetet e vendit.
Gravina shprehu krenarinë që kishte për shqiptarët, të cilët i ka njohur gjithnjë në Itali dhe vlerësoi rolin e futbollit si një mjet për krijimin e lidhjeve miqësore dhe promovimin e vlerave të përbashkëta. Ai vuri në dukje se futbolli tejkalon kufijtë e thjeshtë të sportit, duke u shndërruar në një platformë ku identitetet kulturore forcohen dhe promovohen. Presidenti italian falënderoi Dukën për mbështetje dhe për kontributin e tij në ndërtimin e një identiteti të fortë ndërkombëtar për Shqipërinë.
Gravina gjithashtu e përmendi rëndësinë e futbollit për të rinjtë, duke e cilësuar si një vend të përkatësisë kolektive, ku ata mund të ndihen të pranuar jashtë familjes dhe shkollës. Ai e përshkroi këtë asamble si një moment frymëzues, ku lidhen marrëdhënie të forta miqësie mes dy vendeve.
Në fund, ai i uroi sukese Dukës dhe gjithë anëtarëve të federatës, duke e përfunduar fjalimin me një thirrje për të gjithë ata që janë pjesë e futbollit, duke theksuar se kjo është një ditë feste dhe një hap i rëndësishëm për të ardhmen e futbollit në Shqipëri dhe Evropë. Gravina theksoi se suksesi i futbollit është i lidhur ngushtë me vlerat e miqësisë dhe bashkëpunimit mes vendeve. Ai u shpreh optimist për të ardhmen dhe përsëriti se “Rroftë futbolli”.
