Torre Lapillo, Itali – Një ngjarje e pazakontë ka ndodhur në jug të Italisë, ku një 57-vjeçar hodhi pa dashje në plehra ar me vlerë rreth 130 mijë euro dhe më pas kërkoi ndihmën e policisë për ta rikuperuar.
Burri, nga rajoni i Pulias, kishte investuar prej vitesh të gjitha kursimet e tij në 20 shufra ari, të cilat i ruante në një kuti metalike. Në një moment hutimi, ai e ngatërroi kutinë me mbeturina dhe e hodhi në një kosh plehrash buzë rrugës në Torre Lapillo.
Vetëm të nesërmen ai kuptoi gabimin. Më 3 shkurt, 57-vjeçari u paraqit në komisariatin e Porto Çezareos dhe denoncoi humbjen, duke kërkuar ndihmë për gjetjen e arit. Fillimisht, efektivët e policisë dyshuan në rrëfimin e tij, pasi historia dukej e pabesueshme.
Për të verifikuar pretendimet, uniformat blu kontrolluan pamjet e kamerave të sigurisë, ku u konfirmua se burri kishte hedhur vërtet kutinë metalike në plehra.
Megjithatë, koshi ishte zbrazur tashmë dhe mbeturinat ishin transportuar në një landfill aty pranë. Policia u nis menjëherë drejt vendgrumbullimit të mbetjeve, ku së bashku me punonjësit nisën një kërkim disaorësh mes thesëve të plehrave.
Pas shumë përpjekjesh, kutia metalike u gjet dhe iu rikthye pronarit pas përfundimit të procedurave përkatëse. 57-vjeçari arriti kështu të rimarrë “thesarin” e tij, duke i dhënë fund një prej ditëve më stresuese të jetës së tij.
