Fierza, një fshat që njihet për hidrocentralin e tij, është një nga burimet kryesore të energjisë për të gjithë Shqipërinë.
Megjithatë, edhe pse kontribuon në furnizimin me energji të vendit, ky fshat i bukur i Alpeve shqiptare kalon një pjesë të madhe të dimrit në errësirë. Banorët e Fierzës, të cilët janë mësuar me kushte të vështira, vazhdojnë të përballen me një realitet të hidhur, pasi linjat elektrike të fshatit i përkasin viteve të elektrifikimit dhe nuk janë modernizuar.
Edhe pse banorët kanë ngritur shqetësimin e tyre për disa herë, asnjë masë efektive nuk është marrë për të adresuar këtë problem. Situata ka shkuar deri aty sa banorët e zonës kanë vendosur të ndërhyjnë vetë për të rikthyer energjinë, duke rrezikuar jetën e tyre, siç ka ndodhur edhe sot, kur disa prej tyre janë munduar të rilidhin linjat elektrike të dëmtuara. Një akt që rrezikon seriozisht sigurinë e tyre, por që tregon edhe nivelin e dëshpërimit dhe nevojës urgjente për një zgjidhje.
Një tjetër ngjarje ka ndodhur mbrëmjen e 23 dhjetorit të vitit të kaluar, kur një pjesë e fshatit mbeti në errësirë për shkak të djegies së një bombine në kabinën nr. 2, duke shkaktuar jo vetëm mungesën e energjisë për disa javë, por edhe dëme të mëdha materiale, si djegia e disa elektroshtepiakeve të familjeve që jetojnë atje. Ky incident ka thelluar edhe më shumë ndjesinë e braktisjes dhe harresës nga autoritetet.
Përkundër faktit se Fierza është pjesë e bashkisë së Fushë-Arrëzit, rrjeti energjitik i fshatit mbetet në varësi të OSHEE-së së Bajram Currit. Banorët presin me padurim një ndërhyrje nga kjo kompani, duke e konsideruar si një neglizhencë të papranueshme faktin që fshati, i cili furnizon të gjithë vendin me energji, vazhdon të mbetet në errësirë, veçanërisht gjatë periudhës festash, kur ka më shumë nevojë për ngrohje dhe energji.
Ironia e fatit është e dukshme: Fierza, që ndihmon Shqipërinë të mbijetojë gjatë sezonit të dimrit me energjinë që prodhon, mbetet vetë një fshat i braktisur në errësirë. Banorët kërkojnë një zgjidhje të menjëhershme dhe një përkujdesje më të madhe nga autoritetet për t’i dhënë fund këtij cikli të padrejtë që e ka lënë këtë komunitet në harresë për kaq gjatë.
