Gazetari shqiptaro-amerikan Arian Asimi, ka folur në lidhje me protestën e zhvilluar një ditë më parë nga opozita, duke rrëfyer një moment të vështirë që përjetoi personalisht gjatë përplasjes me gazin lotsjellës dhe incidentet në terren.
I ftuar në emisionin “Oponencë” në News24, Asimi tregoi se fillimisht u kishte kërkuar efektivëve të policisë që të mos përdornin gaz, duke u zhvendosur më pas pranë një cepi afër Parlamentit. Sipas tij, në atë moment një molotov shpërtheu pranë këmbëve të tij, ndërsa dy persona që ndodheshin me të u larguan me vrap.
Ai shtoi se u mbulua pas një peme, ndërsa në zonë kaloi edhe automjeti i policisë që përdorte ujë, duke bërë që ai të mbetej i bllokuar mes tymit dhe gazit lotsjellës. Gazetari deklaroi se në ato momente ndjeu vështirësi serioze në frymëmarrje, pavarësisht se kishte një maskë të lagur.
Sipas tij, situata zgjati rreth dy minuta dhe, në vlerësimin personal, nëse do të kishte zgjatur më shumë, pasojat mund të kishin qenë fatale. Megjithatë, Asimi u shpreh se do të merrte sërish pjesë në protesta.
Ai akuzoi policinë për situatën e krijuar dhe shprehu kritika edhe ndaj kryeministrit Edi Rama, duke e lidhur përgjegjësinë politike me ngjarjen.
