Ministri i Naftës së Indisë, Hardeep Singh Puri, ka pranuar se është takuar disa herë me Jeffrey Epstein gjatë kohës që ndodhej në Shtetet e Bashkuara. Ai sqaroi se kontaktet kanë ndodhur në kuadër të angazhimit të tij si anëtar i Institutit Ndërkombëtar të Paqes deri në vitin 2020, duke theksuar se e ka takuar Epstein “tre, maksimumi katër herë”.
Deklarata e tij erdhi pas kritikave të forta nga lideri i opozitës, Rahul Gandhi, i cili kërkoi shpjegime për marrëdhëniet e ministrit me Epstein. Reagimet pasuan publikimin e disa email-eve nga Departamenti amerikan i Drejtësisë, ku përmendej edhe emri i Purit.
Ministri, i cili ka shërbyer si ambasador i Indisë në OKB nga viti 2009 deri në 2013 dhe mban post ministror që prej vitit 2017, mohoi çdo shkelje apo përfshirje të papërshtatshme.
Puri shtoi se shumica e komunikimeve me Epstein kishin të bënin me një iniciativë për të sjellë në Indi Reid Hoffman, themeluesin e LinkedIn, me qëllim shqyrtimin e mundësive për investime në sektorin e internetit.
Ndërkohë, 78-vjeçari Terje Rød-Larsen, ish-kryetar i Institutit Ndërkombëtar të Paqes dhe figurë e njohur në diplomaci, kërkoi falje për marrëdhënien e tij me Epstein. Gruaja e tij, Mona Juul, dha dorëheqjen nga posti i ambasadores së Norvegjisë për të njëjtën arsye.
Rasti ka nxitur debat të gjerë në Parlamentin Indian mbi etikën dhe transparencën në marrëdhëniet ndërkombëtare.
Kritikët akuzojnë qeverinë e Narendra Modit për mungesë qartësie dhe veprimi lidhur me kontaktet me figura të kontestuara, ndërsa përgjigjet e Purit në parlament kanë thelluar përplasjet politike mes mazhorancës dhe opozitës.
