Ka nisur në Tiranë protesta e qytetarëve kundër qeverisë, e cila ka hyrë në ditën e 38-të.
Qytetarët janë mbledhur në sheshin “Skënderbej”, nga ku marshojnë drejt Kryeministrisë, ku do të mbahen edhe fjalimet e protestuesve.
Pjesëmarrësit janë shfaqur me pankarta në duar dhe flamuj kuqezi, ndërsa kanë bërë thirrje për ndryshim dhe dorëheqjen e kryeministrit Edi Rama.
Protesta ka mbledhur qytetarë të grupmoshave të ndryshme, përfshirë të rinj, studentë, të moshuar, profesionistë dhe aktivistë.
Protestuesit kanë kërkuar plotësimin e pesë kërkesave të tyre, mes të cilave dorëheqjen e kryeministrit Rama, krijimin e një qeverie teknike dhe ndryshime kushtetuese.
Gjatë protestës, disa qytetarë kanë dhënë deklarata për mediat duke shprehur pakënaqësi ndaj qeverisjes dhe situatës ekonomike në vend.
Një prej protestuesve pretendoi se ishte larguar nga puna pasi nuk kishte siguruar vota nga diaspora gjatë zgjedhjeve.
Ai akuzoi qeverinë duke thënë se vendi “qeveriset nga një organizatë kriminale”.
Një tjetër qytetar i moshuar kritikoi vendimin për mbështetjen financiare të koncertit të Kanye West, duke deklaruar se fondet prej 4 milionë eurosh duhej të përdoreshin për pensionistët.
Ai foli gjithashtu për rritjen e çmimeve të banesave dhe vështirësitë ekonomike të qytetarëve.
Në protestë u shfaqën edhe pankarta që i drejtoheshin Ambasadës së SHBA-ve në Tiranë, ku kërkohej një qëndrim i qartë mbi situatën politike në vend.
Ndërkohë, një qytetar i ardhur nga Italia e cilësoi protestën si një nga më të mëdhatë dhe më civile në Shqipëri, duke deklaruar se shqiptarët janë detyruar të largohen nga vendi për shkak të problemeve sociale dhe ekonomike.
