Në prag të ndeshjes së parë gjysmëfinale të Kupës së Mbretit ndaj Atlético Madrid, trajneri i Barcelonës, Hansi Flick, dha një përgjigje provokuese në konferencë për shtyp, kur u pyet për rëndësinë dhe prestigjin e këtij trofeu.
Një gazetar e pyeti Flick-un se çfarë mendon për ata që e minimizojnë vlerën e Kupës së Mbretit ose përpiqen t’ia ulin rëndësinë, me arsyetimin se këtë sezon nuk është përballur ende me një ekip “të madh”. Përgjigjja e gjermanit ishte e shkurtër, por me nënkuptim të qartë: “Pyeteni Real Madridin.”
Debati mbi peshën e Kupës së Mbretit ka qenë i shpeshtë mes tifozëve të Real Madridit dhe Barcelonës, sidomos në krahasim me La Liga-n. Këtë sezon, Real Madrid nuk është në gjysmëfinale, pas eleminimit surprizë nga Albacete në fazën e 1/8-ave, çka ka shtuar edhe më shumë zërat se turneu nuk është gjithmonë prioritet absolut për gjigantët spanjollë.
