SHBA- 35-vjeçarja Carrie Richins, e cila akuzohet se në vitin 2022 helmoi bashkëshortin e saj me qëllim që të përfitonte një dëmshpërblim prej 3.6 milionë dollarësh ka dalë para gjykatës në Utah.
Sipas aktakuzës, Richins, e cila punonte si agjente e pasurive të paluajtshme, i ka dhënë bashkëshortit një dozë vdekjeprurëse fentanili të përzier në një pije që ajo vetë e kishte përgatitur. Prokuroria pretendon se kjo ishte hera e dytë që ajo përpiqej ta vriste, pasi disa javë më parë dyshohet se kishte tentuar ta helmonte me një sanduiç.
Pas arrestimit, 35-vjeçarja deklaroi se pasi i kishte çuar pijen bashkëshortit, kishte rënë në gjumë në dhomën e djalit të saj, pasi po përjetonte makthe. Kur u kthye në dhomën e gjumit të çiftit, ajo pretendon se e gjeti bashkëshortin pa shenja jete.
Sipas prokurorisë, nëna e tre fëmijëve ndodhej në vështirësi financiare në kohën e ngjarjes dhe motivi i dyshuar ishte përfitimi i sigurimit të jetës dhe pasurisë së bashkëshortit, në vlerë prej 3.6 milionë dollarësh.
Hetimet zbuluan gjithashtu se Richins kishte një lidhje me një koleg të saj. Dyshohet se një ditë pas përpjekjes së parë për ta vrarë bashkëshortin, ajo i kishte dërguar atij një mesazh ku shkruante: “Nëse Eriku do të mund të largohej, jeta do të ishte perfekte.”
Richins u arrestua në maj të vitit 2023 dhe përballet me 26 akuza.
