Raphinha ka lënë të hapur mundësinë e rikthimit në fushë për gjysmëfinalen e Kupës së Mbretit ndaj Atlético Madrid, që luhet këtë të enjte. Në një intervistë të shkurtër për gazetarin Sergi Capdevila, braziliani 29-vjeçar u shpreh se ende nuk ka siguri dhe se gjithçka varet nga vlerësimi i stafit mjekësor.
“Ka një mundësi të luaj të enjten kundër Atleticos, por ende nuk e di”, tha ai, duke shtuar më tej pasigurinë rreth gjendjes së tij fizike. Raportet e mëparshme kishin bërë të ditur se Raphinha pësoi një tërheqje muskulore në adduktorin e këmbës së majtë dhe, për të shmangur përkeqësimin, stafi teknik vendosi ta pushojë para ndeshjeve të fundit.
Këtë sezon, Raphinha ka zhvilluar 22 ndeshje me Barcelonën, me 13 gola dhe 5 asistime. Kontrata e tij me “Blaugrana” është e vlefshme deri në vitin 2028, ndërsa vlera e tij në treg sipas Transfermarkt vlerësohet rreth 80 milionë euro.
