Shumë pedagogë në universitete po i kthehen provimeve me gojë për të parandaluar mashtrimet e asistuara nga inteligjenca artificiale. Në institucione si Universiteti i Wyoming, Vanderbilt dhe UC San Diego, studentët po vlerësohen përmes pyetjeve ballë për ballë, në mënyrë që të mos mbështeten te mjete si ChatGPT për të dhënë përgjigje të gatshme.
Studentët ulen me pedagogun për një kohë të caktuar dhe shpjegojnë idetë në moment, në një format që është i vështirë për t’u “imituar” nga kompjuterët. Kjo qasje po fiton gjithnjë e më shumë interes, ndërsa detyrat online dhe ato për në shtëpi po bëhen më të lehta për t’u realizuar me ndihmën e AI-së, dhe programet për zbulimin e saj po hasin vështirësi të mbajnë ritmin.
Disa studentë thonë se provimet me gojë i ndihmojnë të mësojnë më mirë dhe të tregojnë realisht çfarë dinë, ndërsa pedagogët theksojnë se kjo metodë e zhvendos fokusin nga “policimi” i AI-së te testimi i kuptimit të vërtetë.
