Polonia ka paraqitur në parlament një projektligj që synon kufizimin e aksesit në mediat sociale për adoleshentët nën moshën 16 vjeç.
Sipas nismës, e propozuar nga ligjvënësit e partisë së krahut të djathtë në pushtet, çdo individ nën këtë moshë do të duhet të ketë pëlqimin e prindërve për të përdorur platformat e rrjeteve sociale.
Projektligji parashikon që adoleshentët e moshës 13 deri në 16 vjeç të mos mund të regjistrohen në mediat sociale pa një sistem verifikimi që garanton miratimin parental. Ky mekanizëm do të bazohet në një softuer të ngjashëm me atë që përdoret aktualisht nga administrata portugeze.
Deputetët që kanë paraqitur nismën theksojnë se ajo mbështetet në literaturë të specializuar dhe të dhëna shkencore të fundit, të cilat sugjerojnë se ekspozimi i hershëm ndaj mediave sociale, para moshës 16 vjeç, mund të ketë pasoja negative në zhvillimin social dhe njohës të fëmijëve.
Sipas tyre, ndikimi i këtyre platformave po bëhet gjithnjë e më problematik dhe i dëmshëm për adoleshentët.
Kjo nismë vjen në një kohë kur debati mbi vendosjen e një moshe minimale për përdorimin e mediave sociale po intensifikohet në Evropë.
Australia ishte vendi i parë që miratoi një ligj të tillë në dhjetor, duke ndaluar mediat sociale për të rinjtë nën 16 vjeç.
Ndërkohë, parlamenti francez miratoi javën e kaluar një projektligj që ndalon përdorimin e mediave sociale për të miturit nën 15 vjeç, si masë për mbrojtjen e shëndetit të tyre mendor.
Edhe Danimarka, Greqia dhe Spanja po shqyrtojnë masa të ngjashme dhe mbështesin idenë e një ndalimi të përbashkët në nivel të Bashkimit Evropian.
Kjo prirje reflekton shqetësimin në rritje për ndikimin e mediave sociale te të rinjtë dhe përpjekjet për të vendosur rregulla më strikte në funksion të shëndetit dhe mirëqenies së fëmijëve në epokën digjitale.
