Jeffrey Epstein, sipas dokumenteve të publikuara nga Departamenti amerikan i Drejtësisë, përpiqej të aksesonte asetet e ngrira të shtetit libian përmes një rrjeti ish-zyrtarësh të inteligjencës britanike dhe izraelite. Një email i dërguar në korrik 2011, i zbuluar në këto dokumente, shprehte planin për të shfrytëzuar “turbulencat politike dhe ekonomike” në Libi për të identifikuar dhe rikuperuar fondet libiane të ngrira në vendet perëndimore, të cilat arrinin në rreth 80 miliardë dollarë, përfshirë 32.4 miliardë në Shtetet e Bashkuara.
Në këtë komunikim, Epstein e përshkruante situatën si një mundësi strategjike për investime financiare dhe ligjore, duke theksuar se asetet ishin “të vjedhura dhe të keqpërdorura”, me një vlerë potenciale që mund të ishte tri deri në katër herë më shumë se sa vlera e ngrirë. Ai diskutonte gjithashtu me firma ligjore ndërkombëtare për të punuar në këtë rast me pagesë vetëm në rast të fitimit të procesit.
Ish-zyrtarë të inteligjencës britanike MI6 dhe Mossad të Izraelit ishin shprehur të gatshëm për të kontribuar në përpjekjet për identifikimin dhe rikuperimin e këtyre aseteve. Sipërmarrjet e propozuara sugjeronin se rikuperimi i një pjese të vogël të këtyre fondeve mund të sjellë “miliona dollarë” dhe dica kishin parashikuar se Libia do të kishte nevojë të shpenzonte të paktën 100 miliardë dollarë për rindërtim dhe rikuperim ekonomik.
Megjithatë, Libi po përballet me vështirësi të mëdha në rikuperimin e fondeve të saj të ngrira në vendet perëndimore, të cilat u vendosën sipas Rezolutës 1973 të Këshillit të Sigurimit të OKB-së, miratuar në mars 2011, si pjesë e sanksioneve ndaj regjimit të Muammar Gaddafit gjatë kryengritjes që e përmbysi atë. Qeveria e Unitetit Kombëtar ka formuar një komitet ligjor për të ndjekur këtë çështje, por vazhdimi i konflikteve ka penguar zbatimin e kësaj rezolute, duke justifikuar vonesat në rikuperimin e fondeve. Dokumentet nuk tregojnë nëse planet e Epstein për të aksesuar asetet e ngrira kanë shkuar përtej diskutimeve fillestare.
