Sergio Ramos duket se ka ndryshuar kushtet për blerjen e Sevilla, duke ofruar shumë më pak para nga sa ishte rënë dakord më parë me aksionerët e klubit.
Sipas AS, ish-kapiteni i Sevillës nuk ka arritur të sigurojë kontributin financiar të premtuar nga Five Eleven Capital dhe për këtë arsye nuk beson se mund të mbledhë shumën fillestare prej rreth 450 milionë eurosh, duke përfshirë edhe borxhet e klubit.
Ramos zhvilloi një tjetër takim në kryeqytetin andaluzian së bashku me vëllain e tij René dhe avokatin Julio Senn, por këtë herë propozimi i tij ka krijuar pakënaqësi të madhe mes aksionerëve.
Oferta, që fillimisht ishte rreth 450 milionë euro minus borxhin neto, ka zbritur në afërsisht 220 milionë euro. Plani i ri parashikon blerjen e rreth 30 mijë aksioneve për 100 milionë euro, në vend të 86 mijë aksioneve që ishin parashikuar më parë.
Një tjetër ndryshim lidhet me rritjen e kapitalit, e cila nuk do të ishte më 80 milionë euro, por 120 milionë euro. Në këtë mënyrë, Ramos do të siguronte rreth 60% të kontrollit të Sevilla.
Disa aksionerë e kanë cilësuar propozimin si “të papranueshëm”, ndërsa një pjesë e tyre po mendojnë të tërhiqen dhe të kërkojnë një blerës tjetër. Megjithatë, ka edhe grupe që po e shqyrtojnë ofertën, përfshirë familjen Carrión.
Luis Carrión deklaroi se palët kanë marrë propozimin dhe se një përgjigje pritet të jepet shumë shpejt, pasi ekziston një letër që përcakton afate konkrete.
Tani e ardhmja e operacionit mbetet e paqartë. Ramos dëshiron të marrë kontrollin e Sevilla, por ulja e ndjeshme e ofertës ka komplikuar negociatat dhe ka rritur tensionin mes aksionerëve.
