Saga e merkatos për Anthony Gordon ka marrë fund. Barcelona ka arritur marrëveshjen finale me Newcastle United për transferimin e anësorit anglez.
Sipas Fabrizio Romano, drejtuesit e Newcastle dhe pronarët sauditë të klubit kanë pranuar ofertën përfundimtare të katalanasve, duke i hapur rrugë kalimit të lojtarit në “Camp Nou”.
Marrëveshja pritet të kapë shifra shumë të larta. Barcelona do të paguajë 70 milionë euro si shumë fikse, ndërsa bonuset lehtësisht të arritshme mund ta çojnë totalin e operacionit mbi 80 milionë euro.
Me këtë ofertë, drejtuesit e Barçës kanë plotësuar kërkesat e Newcastle dhe kanë lënë pas klubet e tjera të interesuara për Gordon.
Gjithçka pritet të mbyllet shumë shpejt. Anësori anglez mund të udhëtojë drejt Katalonjës që nesër për të kryer vizitat mjekësore dhe për të firmosur kontratën afatgjatë me Barcelonën.
