Kryetari i Grupit Parlamentar të PS, Taulant Balla në një deklaratë për mediat pas përfundimit të mbledhjes së Konferencës së Kryetarëve tha se janë në një proces intensiv shqyrtimi në Kuvend të projektligjeve që lidhen me parakushtet që Shqipëria duhet të plotësojë sa i përket realizimit të aspiratës për anëtarësim në BE. Balla paralajmëroi se seancat plenare mund të shtohen gjatë një jave për shkak të intensitetit të punës.
Balla: 2026 sa i përket punës së Kuvendit të Shqipërisë, mendo jse do jetë një prej viteve parlamentare me intensitetin më të madh për shkak të numrit të çështjeve.
Sa i përket Komisionit për Reformën Territoriale, Balla i kërkoi opozitës që të reflektojnë dhe të marrin pjesë.
Balla: Unë nuk bëj ultimatume, por kam bërë një kërkesë kolegëve të PD që të reflektojnë sa i përket detyrimit që kanë për të zbatuar vendimin e Kuvendit për ngritjen e Komisionit të Posaçëm për Reformën Administrative- Territoriale.
Tre muaj pas ngritjes së Komisionit, deputetët e PD nuk lejohen nga lidershipi i tyre për të marrë pjesë. Besoj dhe shpresoj që në mbledhjen e sotme, jo vetëm deputetët e opozitës të jenë prezent, por të marrin edhe detyrat, në mënyrë që nesër ne seancën e Kuvendit të mos vendosim mekanizma zhbllokues.
Ky mekanizëm zhbllokues do të aplikohet tek komisioni i posacëm për territorialen, nëse nuk ka reflektim dhe Shqipëria është e detyruar të adresojë rekomandimet shumë vjeçare të ODIHR. Unë mendoj që dialogu e ka parakusht të vetëm pjesëmarrjen. Me këtë të dialogoj, kur ai nuk vjen.
Ditën e sotme është parashikuar që të mblidhet komisioni i posaçëm i reformës territoriale ndërsa skadon edhe afati i fundit i mazhorancës që Partia Demokratike t’i rikthehet punimeve.
Partia Socialiste është shprehur se nëse PD vijon bojkotin do të heqë bashkëdrejtimin në mënyrë që të vijojë puna për Reformën Territoriale.
