Policia Kufitare në PKK Rinas ka finalizuar me sukses operacionin policor të koduar “Siguria”, duke goditur një rast të tentativës për trafikim të armëve të zjarrit nga Shqipëria drejt Italisë.
Gjatë kontrolleve të shtuara në dalje të vendit, të bazuara në analizën e riskut dhe informacionet e inteligjencës policore, shërbimet e Policisë Kufitare, në bashkëpunim me shërbimet e sigurisë së aeroportit të Rinasit, kanë kapur në flagrancë dhe arrestuar shtetasin shqiptar H. H., 30 vjeç, rezident në Itali.
Nga kontrolli me skaner i bagazheve të tij, policia gjeti dhe sekuestroi 1 armë zjarri pistoletë me municion luftarak, e cila u mor në cilësinë e provës materiale.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprën penale “Trafikimi i armëve dhe i municionit”.
Policia Kufitare Rinas vijon punën intensive për garantimin e sigurisë, lëvizjen e lirë të shtetasve dhe parandalimin e çdo paligjshmërie në pikat e kalimit kufitar.
