Një gjykatë në Afrikën e Jugut ka refuzuar një apel nga Agjencia e Burimeve të Trashëgimisë (SAHRA) për të ndaluar shitjen dhe eksportin e objekteve personale të Nelson Mandelës, duke i hapur rrugë vajzës së tij më të madhe, Makaziwe Mandela, për të realizuar këtë shitje. Në grupin e 70 objekteve përfshihen një çelës qelie nga ishulli Robben, ku Mandela kaloi 18 nga 27 vitet e burgosjes, një palë syze Aviator dhe një nga këmishat e tij me lule.
Objektet ishin planifikuar të eksportohej në SHBA për t’u shitur në një ankand. SAHRA pretendonte se këto objekte ishin pjesë e trashëgimisë kombëtare dhe se ishin të mbrojtura ligjërisht nga eksporti. Ajo e mori vesh për shitjen përmes një artikulli në një gazetë britanike në fund të vitit 2021, ku flitej se çelësi mund të arrixe deri në 1 milion paund (rreth 1.35 milion dollarë).
Makaziwe Mandela dhe Christo Brand, një rojë në Robben Island gjatë burgosjes së Mandelës, dëshironin që të ardhurat nga shitja të përdoren për të ndërtuar një kopsht memorial në varrin e tij në Qunu, në provincën Eastern Cape. Në vendimin e saj, Gjykata Supreme e Apelit e konsideroi interpretimin e SAHRA-s për objektet si tepër të gjerë. Gjykata theksoi se Makaziwe dhe Brand kishin shpjeguar në detaje pse asetet e tyre nuk ishin objekte trashëgimie, ndërsa SAHRA nuk kishte ofruar asnjë argument përkundrejt pretendimeve të tyre.
Ndërkohë, nuk është ende e qartë nëse autoritetet do të kërkojnë rrugë të tjera ligjore për të bllokuar shitjen. Disa mbështetës të qëndrimit të qeverisë besojnë se objektet e lidhura me Mandelën nuk duhet të shiten, por të mbahen në Afrikën e Jugut për brezat e ardhshëm, ndërsa të tjerë mendojnë se familja e Mandelës duhet të vendosë për fatin e tyre. Nelson Mandela vdiq në vitin 2013 në moshën 95-vjeçare dhe ishte lideri i Partisë Kombëtare Afrikane në luftën kundër apartheidit. Ai njihet për çmimin Nobel për Paqe dhe për të qënë presidenti i parë demokratik i Afrikës së Jugut.
