Kryetari i Partisë Demokratike, Sali Berisha, deklaroi se opozita ka votuar në parim marrëveshjen me Shtetet e Bashkuara të Amerikës për Bordin e Paqes, por nuk ka votuar emrin e kryeministrit Edi Rama.
Gjatë një interviste në emisionin Opinion, Berisha sqaroi se qëndrimi i opozitës ka qenë në përputhje me interesin e Shqipërisë dhe me praktikën e ndjekur ndër vite në raport me nismat e SHBA-së në fushën e sigurisë.
Sipas tij, dokumenti është votuar vetëm në parim, ndërsa gjatë votimit nen për nen, opozita nuk ka mbështetur përfshirjen e emrit të kryeministrit.
Berisha theksoi se Partia Demokratike ka qenë pro marrëveshjes si nismë ndërkombëtare, por kundër, sipas tij, personalizimit të saj.
‘U votua në parim sepse unë dua ta them këtu, gjatë gjithë kohës në pushtet, ka qenë porosi e prerë e përfaqësuesve të Shqipërisë në të gjitha institucionet ndërkombëtare, ka qenë do të votoni siç votojnë Shtetet e Bashkuara, për çështje sigurie.
Ne votuam marrëveshjen në parim.
Por kur u bë votimi nen për nen, ne nuk e votuam Edi Ramën.
Ne dokumentin e votuam në parim, jo nen për nen. I thamë Edi Ramës, ti nxin, ti turpëron. Ishte ulur pranë Lubisë (referuar ministres Belinda Balluku), i thamë që ajo do të të marrë me vete ty.
Qëndrimi ynë ishte pro Shqipërisë, paçka se Rama dhe Lukashenko e personalizuan ftesën. Ftesa u dërgohet vendeve’, tha Berisha gjatë intervistës në ‘Opinion’.
