Një shtetas shqiptar, 35 vjeç, është arrestuar në Ankona për posedim të lëndëve narkotike me qëllim shpërndarjeje, pasi iu gjetën rreth 2.5 kilogramë kokainë, e ndarë në dhjetëra doza gati për shitje.
Operacioni u zhvillua në mëngjesin e 21 janarit, pas disa javësh ndjekjesh, vëzhgimesh dhe përgjimesh nga Policia italiane. I dyshuari u kap në flagrancë teksa po shiste një dozë kokaine një shtetasi italian, gjithashtu 35 vjeç.
Gjatë kontrollit personal, policia gjeti 15 doza kokaine me peshë totale rreth 6 gramë, të fshehura brenda një ene plastike. Kontrolli i mëvonshëm në banesën e tij çoi në zbulimin e 75 dozave të tjera të gatshme për shitje, me peshë rreth 40 gramë, të mbyllura hermetikisht dhe të paketuara në të njëjtën mënyrë.
Në vijim të operacionit, autoritetet zbuluan edhe gjashtë pako që përmbanin rreth 2.5 kilogramë lëndë narkotike, si dhe materiale për paketimin e dozave, dy peshore (një dixhitale dhe një precize) dhe mbi 3 mijë euro para të gatshme, që dyshohet se janë përfituar nga aktiviteti i paligjshëm.
