Fundjava solli një pamje të paharrueshme: Senegali ngriti edhe një tjetër trofe të Kupës së Afrikës në tokën marokene. Maroku u bashkua me listën e vendeve organizatore që kanë humbur një turne të madh para tifozëve të vet, dhe një nga momentet vendimtare ishte penalltia e humbur e Brahim Díaz.
Lojtari i Real Madridit, njëherësh golashënuesi më i mirë i turneut, mori përsipër penalltinë që mund të vendoste fatin e finales. Ai tentoi një goditje “Panenka”, por portieri Edouard Mendy e kuptoi qëllimin dhe e priti, duke e lënë ndeshjen të shkonte në shtesë.
Aty, Senegali gjeti golin e triumfit me një realizim spektakolar nga Pape Gueye, duke e kthyer vëmendjen e të gjithëve te një emër: Brahim Díaz. Pas finales, ai publikoi një mesazh ndjese, ku shprehu dhimbjen për dështimin dhe mori përgjegjësinë: tha se kishte ëndërruar titullin, se kishte luftuar me gjithë zemër dhe kërkoi falje sinqerisht.
Mes mbështetjes nga kolegë e trajnerë, një zë i fortë në mbrojtje të tij ishte Luis Enrique. Trajneri i PSG-së e komentoi situatën para ndeshjes së Ligës së Kampionëve, duke kujtuar se edhe legjendat kanë bërë të njëjtën gjë: “E folëm sot në autobus. Të gjithë po flasin për Brahimin, por unë më kujtohet Zidane dhe ai e bëri në një finale Kupe Bote. Më kujtohet edhe Sergio Ramos,” tha spanjolli, duke shtuar se kur shënon, të duartrokasin, por kur gabon, vijnë menjëherë komentet negative.
Luis Enrique kujtoi edhe se Brahim ishte grumbulluar nga ai te kombëtarja e Spanjës dhe e përshkroi si “lojtar të shkëlqyer dhe njeri shumë të mirë”. Ai e quajti goditjen “të çuditshme” për shkak të momentit dhe peshës së finales, por insistoi te mesazhi kryesor: “Më e rëndësishmja janë vlerat që transmeton. Brahim nuk është vrasës, as njeri i keq. Është e rëndësishme ta thuash këtë,” përfundoi ai para mediave.
