Manipulimi i hasur gjatë numërimit të votave ka detyruar rinumërimin e përgjithshëm të votave të zgjedhjeve të 28 dhjetorit. Sipas Komisionit Qendror të Zgjedhjeve, ky proces do të zgjasë rreth 12 deri në 14 ditë. Rinumërimi pritet të realizohet mes 1 dhe 3 shkurtit. Pas kësaj, duhet të priten ankesat para se rezultatet të shpallen.
Sipas ligjit, kandidatët kanë 48 orë për të paraqitur ankesa për shkelje të supozuara, ndërsa Paneli Zgjedhor për Ankesa dhe Parashtresa (PZAP) ka 72 orë për të dhënë vendimin e tij. Ky vendim mund të kontestohet në Gjykatën Supreme, e cila gjithashtu ka një afat prej tre ditësh për të vendosur. Kjo procedurë e ankesave mund të zgjatë deri në 10 ditë të tjera, duke shtyrë shpalljen e rezultateve.
Kjo do të thotë se KQZ mund të certifikojë rezultatet midis 21 dhe 23 shkurtit. Sipas analistëve, në një skenar optimal, certifikimi do të ndodhte në mes të shkurtit, ndërsa në rastin më të keq do të mund të shtyhej deri në fillim të marsit, në varësi të vendimmarrjeve mbi ankesat.
Partitë politike, sidomos fituesi i zgjedhjeve Lëvizja Vetëvendosje, kanë një afat të ngushtë prej 10 ditësh për të formuar institucionet e reja, duke filluar nga konstituimi i Kuvendit deri te formimi i qeverisë dhe zgjedhja e presidentit. Seanca konstituive e Kuvendit duhet të thirret brenda 30 ditëve dhe kërkon 61 vota për të avancuar. Megjithatë, Lëvizja Vetëvendosje nuk e ka numrin e nevojshëm të deputetëve për të votuar presidentin, duke i shtyrë për diskutime me partitë e tjera.
Eshte e domosdoshme që qeveria e re t’i japë përparësi miratimit të buxhetit për vitin 2026, pasi buxheti aktual është me afat deri në fund të shkurtit. Sipas ligjit për menaxhimin e financave publike, ndarjet e buxhetit nga viti i kaluar nuk mund të zgjaten për më shumë se tre muaj. Nëse kjo nuk zgjidhet, asnjë organizatë buxhetore nuk mund të autorizojë shpenzime deri në miratimin e ligjit të ri për ndarjet buxhetore.
