Minuta e 114-të e kohës së rregullt, pak çaste para shtesës. Brahim merr përsipër të godasë penalltinë më të diskutuar të turneut, mes polemikash globale dhe kërcënimit për protesta nga Senegali. Me fytyrë të ngrirë dhe shikimin të fiksuar te porta, lojtari i Real Madridit vendos të rrezikojë dhe provon një Panenka. Mendy nuk lëviz. Topi përfundon lehtë në duart e tij. Gabim fatal, shtesë loje, gol i Senegalit dhe dramë e madhe në Marok – dhe mbi të gjitha për Brahimin.
Ngjarjet u rrokullisën shpejt dhe rëndë për futbollistin nga Malaga. Për disa ishte hero, për të tjerë u kthye në “armik”. I tronditur, me kokën ulur, ai u afrua drejt stolit, ku edhe trajneri i Marokut, Walid Regragui, dukej se e qortoi për vendimin e tij. Pak më vonë, Brahim u zëvendësua dhe u largua mes vërshëllimave të tifozëve. I dërrmuar emocionalisht, ai u pa duke qarë, madje edhe kur doli për të marrë çmimin e golashënuesit më të mirë të turneut: 5 gola në 7 ndeshje.
“Ia mbaj inat për gjithë jetën. Është mungesë respekti ndaj ndeshjes, finales, kontinentit, të godasësh një penallti në atë mënyrë.”
Në RMC Sports, trajneri dhe analisti Régis Brouard ishte i drejtpërdrejtë dhe i ashpër: “Do t’ia mbaj inat për gjithë jetën. Është mungesë respekti ndaj ndeshjes, finales, kontinentit. Mungesë respekti ndaj trajnerit dhe skuadrës së tij.”
Edhe ish-lojtari holandez me origjinë marokene, Khalid Boulahrouz, nuk u kursye: “Ti nuk je Zidane, nuk je Ronaldo, nuk je Hakimi. Nuk e ke atë status. Mund të kesh shënuar pesë gola… por kjo është jashtëzakonisht e dhimbshme.”
Gabimi ishte aq i hapur, sa disa nisën të aludojnë edhe për një veprim të qëllimshëm. Madje, lojtarët e Senegalit nuk festuan shumë, duke ushqyer teoritë konspirative. Por portieri Mendy i hodhi poshtë prerazi këto zëra në beIN Sports: “Aspak. Le të jemi seriozë. A mendon vërtet dikush se, me një minutë nga fundi dhe një vend që pret këtë titull prej 50 vitesh, mund të binim dakord për diçka të tillë? Ai donte të shënonte dhe unë bëra punën time duke e pritur, kaq.”
“Ai donte të shënonte, unë e ndala. Asgjë më shumë.”
