Një studim i ri shkencor, realizuar nga Instituti për Kërkime mbi Kancerin në Londër (ICR), ka zhvilluar një test të thjeshtë gjaku që mund të parashikojë në fazat e hershme se cili trajtim do të jetë më efektiv për pacientët me kancer të gjirit. Ky test analizon ADN-në tumorale të qarkulluar në gjak (ctDNA), duke ofruar informacion mbi reagimin e mundshëm ndaj terapi përpara se të fillohet trajtimi ose vetëm katër javë pas fillimit të tij.
Në studim, u përfshinë 167 pacientë me kancer të avancuar të gjirit. Rezultatet treguan që ata me nivele të ulëta të ctDNA-së në fillim të trajtimit kishin shumë më shumë gjasa të përfitojnë nga terapia dhe të kishin një periudhë më të gjatë pa përparim të sëmundjes. Ky informacion u jep mjekëve mundësinë të rregullojnë trajtimin në kohë, duke ofruar mundësi më të përshtatshme, si terapia specifike ose përfshirje në studime klinike.
Pacientët u ndanë në dy grupe: një grup me mutacione gjenetike të trajtueshme dhe një tjetër me kancer gjiri trefish negativ, një formë më agresive e sëmundjes. Në grupin e dytë, ata me nivele të ulëta të ctDNA-së para trajtimit jetuan mesatarisht më shumë se dyfish pa përkeqësim të sëmundjes, krahasuar me ata me nivele të larta.
Pas katër javësh, analiza e ctDNA-së tregoi se pacientët pa ADN të dallueshme në gjak kishin rezultate dukshëm më të mira dhe një kontroll më afatgjatë të sëmundjes. Studiuesit e përshkruan këtë test si një metodë jo-invazive, të shpejtë dhe të besueshme për të monitoruar reagimin ndaj trajtimit dhe për të personalizuar terapi.
Profesor Nicholas Turner nga ICR theksoi se, ndonëse studimi përqendrohet në kancerin e avancuar të gjirit, testi mund të jetë gjithashtu i dobishëm për fazat e hershme të sëmundjes, duke rritur saktësinë dhe efektivitetin e trajtimeve. Ky zhvillim mund të sjellë një revolucion në mënyrën se si trajtohet kanceri i gjirit, duke ofruar shpresa të reja për pacientët.
