Problemi i djegies së fushës së mbetjeve në qytetin e Vlorës vijon të mbetet një shqetësim i madh për banorët e zonës.
Pasditen e kësaj së enjtes,vendgrumbullimi i mbeturinave është përfshirë përsëri nga flakët, duke shkaktuar një situatë të vështirë për qytetarët dhe autoritetet lokale. Edhe pse në verë zjarret u justifikuan me pretekstin e temperaturave të larta, duket se ato po ndizen “vetëvetiu” edhe në dimër!
Forcat zjarrfikëse ishin sot pasdite në vendin ku grumbullohen mbeturinat, për të bërë shuarjen e zjarrit.
Ky nuk është rasti i parë që fusha e mbetjeve në Vlorë përfshihet nga zjarri. Disa muaj më parë, një ngjarje e ngjashme tronditi qytetin, kur flakët morën përmasat e një zjarri të dyshuar si i qëllimshëm, që shpërtheu për shkak të mbetjeve të shumta dhe kushteve të papërshtatshme. Ajo periudhë ishte e shoqëruar me shumë rindezje të tjera të zjarrit, që i dhanë një tjetër dimension këtij fenomeni shqetësues.
Situata u rëndua shumë në qytetin e Vlorës në mes të sezonit turistik, pasi tymi i vazhdueshëm nga zjarri mbulon një pjesë të madhe të qytetit, duke ndikuar seriozisht në cilësinë e ajrit dhe shëndetin e banorëve.
