Pas largimit të Xabi Alonso-s nga posti i trajnerit, Real Madridi shpreson të zhbllokojë më në fund rinovimin me Vinicius Junior. Sipas Carusel Mercato, Florentino Pérez beson se tani nuk ka më pengesa mes klubit dhe brazilianit sa i përket firmës në kontratën e re.
Raporti shton se pesë muaj më parë, gjatë një raundi negociatash, 25-vjeçari e kishte bërë të qartë që nuk do të firmoste marrëveshje të re për sa kohë Xabi Alonso ishte në krye të skuadrës. Në prapaskenë, lëvizjet brenda klubit kanë pasur ndikim edhe në largimin e Alonso-s.
Tashmë që Alonso nuk është më trajner, Vinicius nuk ka “arsye objektive” për të refuzuar rinovimin, përveç kërkesave financiare. Në Madrid besohet se momenti më i mundshëm për zgjatjen e kontratës është fundi i sezonit, por drejtuesit janë të gatshëm t’i rifillojnë bisedimet që këtë dimër.
Këtë sezon, Vinicius Junior ka zhvilluar 28 ndeshje me Real Madridin, me 6 gola dhe 8 asistime. Kontrata e tij aktuale me “Galácticos” skadon në verën e vitit 2027, ndërsa Transfermarkt e vlerëson kartonin e tij në 150 milionë euro.
