Një ortek i madh është shkëputur dje, të enjten (15/1), në qendrën e skive Elbrus në rajonin Kabardino-Balkaria të Rusisë.
Video që qarkullon në rrjetet sociale tregon momentin kur orteku rrëshqet me shpejtësi përgjatë shpatit të malit Elbrus, duke mbuluar pjesë të qendrës së skive dhe zonat pranë pistave dhe objekteve.
Sipas informacioneve të para, autoritetet lokale kanë shpallur menjëherë gjendjen e alarmit, ndërsa ekipet e shpëtimit janë mobilizuar për kontroll preventiv në zonë, për shkak të frikës për persona të bllokuar nga orteku.
Derisa deri tani nuk ka raportime për të lënduar, kërkimet dhe kontrolli vazhdojnë.
Qendra e skive Elbrus, që ndodhet në Malet Kaukaz, është destinacion i njohur për skiatorë dhe alpinistë, dhe përballet shpesh me mot ekstrem gjatë dimrit. Autoritetet kanë paralajmëruar për rritjen e rrezikut të ortekëve dhe u bëjnë thirrje vizitorëve të ndjekin udhëzimet e sigurisë dhe të shmangin zonat e rrezikshme deri në përfundimin e vlerësimit të situatës.
