Presidenti i SHBA-së, Donald Trump deklaroi se Kievi, dhe jo Moska, është arsyeja pse një marrëveshje paqeje mes Rusisë dhe Ukrainës nuk është arritur ende.
Në një intervistë për agjencinë Reuters, Trump tha se presidenti rus Vladimir Putin është i gatshëm të negociojë për t’i dhënë fund pushtimit katërvjeçar të Ukrainës, ndërsa sipas tij, presidenti ukrainas Volodymyr Zelensky po tregohet më i rezervuar.
“Mendoj se (Putini) është gati të bëjë një marrëveshje. Mendoj se Ukraina është më pak e gatshme të bëjë një marrëveshje,” u shpreh Trump.
Kur u pyet pse bisedimet e ndërmjetësuara nga SHBA nuk kanë prodhuar rezultate konkrete deri tani, ai përmendi vetëm një emër: “Zelensky”.
Deklaratat vijnë në një kohë kur Trump ka shfaqur disa herë pakënaqësi ndaj qëndrimit të Zelenskyt, megjithëse marrëdhëniet mes dy liderëve janë raportuar se janë përmirësuar gjatë vitit 2025.
