Një 18-vjeçar shqiptar është dënuar me burg në Irlandë pasi mbërriti në Aeroportin e Dublinit pa asnjë dokument identifikimi.
Amarildo Coku, i cili nuk ka adresë dhe asnjë lidhje me vendin, u arrestua menjëherë pas uljes së avionit në kuadër të “Operacionit Fáilte”, një nismë që synon identifikimin e hyrjeve të paligjshme.
Coku ndodhet në paraburgim që prej 21 tetorit. Gjatë seancës gjyqësore në Gjykatën e Qarkut Cloverhill, ai u deklarua fajtor për shkelje të nenit 11 dhe 12 të Ligjit irlandez për Emigracionin, i cili kërkon që shtetasit e huaj të paraqesin pasaportë ose dokument identiteti në hyrje të vendit.
“Ai nuk mund të kishte hipur në avion pa pasaportë, por kur mbërriti nuk kishte asnjë dokument me vete,” tha gjyqtari Alan Mitchell, duke theksuar se rastet e tilla trajtohen me seriozitet dhe parashikojnë deri në një vit burg.
