Departamenti Amerikan i Shtetit (DASH) ka vendosur pezullimin e përkohshëm të përpunimit të vizave të emigracionit për shtetasit e disa vendeve, mes të cilave edhe Shqipëria.
Lajmi është bërë i ditur përmes një dokumenti të brendshëm të DASH, të siguruar nga media e huaj Fox News, i cili thuhet se u është shpërndarë përfaqësive diplomatike dhe zyrave konsullore amerikane.
Sipas raportimeve, pezullimi prek vetëm vizat e emigracionit, që përfshijnë kategoritë për bashkim familjar, aplikimet për green card dhe format e tjera të emigrimit të përhershëm në Shtetet e Bashkuara.
Ndërkohë, theksohet se vizat jo-emigruese, si ato turistike dhe të biznesit (B1/B2), nuk janë përfshirë në këtë pezullim dhe vazhdojnë të trajtohen sipas procedurave ekzistuese.
Zyrtarët konsullorë janë udhëzuar që ky vendim do të hyjë në fuqi prej datës 21 janar 2026, dhe nuk do të vijohet me përpunimin e këtyre aplikimeve deri në një njoftim të dytë.
Sipas raportimeve, ky vendim ka ardhur si përpjekje për të goditur aplikantët që konsiderohen të bëhen barrë publike për vendin amerikan.
Vendimi nuk shoqërohet me një afat të përcaktuar dhe do të mbetet në fuqi derisa DASH të përfundojë këtë proces rishikimi.
Lista e plotë e vendeve ku do të pezullohen vizat për emigrantët përfshin:
Afganistanin, Shqipërinë, Algjerinë, Antigua dhe Barbudën, Armeninë, Azerbajxhanin, Bahamas, Bangladeshin, Barbadosin, Bjellorusinë, Belizen, Butanin, Bosnjën, Brazilin, Burmën, Kamboxhian, Kamerunin, Kepin e Gjelbër, Kolumbinë, Bregun e Fildishtë, Kubën, Republikën Demokratike të Kongos, Dominikën, Egjiptin, Eritrenë, Etiopinë, Fixhin, Gambinë, Gjeorgjinë, Ganën, Grenadën, Guatemalën, Guinenë, Haitin, Iranin, Irakun, Xhamajkën, Jordaninë, Kazakistanin, Kosovën, Kuvajtin, Kirgistanin, Laosin, Libanin, Liberinë, Libinë, Maqedoninë, Moldavinë, Mongolinë, Malin e Zi, Marokun, Nepalin, Nikaraguanë, Nigerinë, Pakistanin, Republikën e Kongos, Rusinë, Ruandën, Shën Kitsin dhe Nevisin, Shën Luçinë, Shën Vincenti dhe Grenadinet, Senegalin, Sierra Leonen, Somalinë, Sudanin e Jugut, Sudanin, Sirinë, Tanzaninë, Tajlandën, Togon, Tunizinë, Ugandën, Uruguain, Uzbekistanin dhe Jemenin.
