Fshati Hasturkas, i njësisë administrative Libofshë, vazhdon të përballet me një situatë problematike pas daljes së lumit Seman nga shtrati. Edhe pse niveli i ujit ka shënuar një rënie të lehtë prej rreth 20 centimetra, shumë banesa mbeten të përmbytura me një nivel uji mbi një metër, duke i bërë ato të pabanueshme. Rreth 20 familje janë detyruar të lënë shtëpitë e tyre dhe të strehohen në zona më të sigurta, ndërsa dëmet në ekonomi janë të konsiderueshme, sidomos në stane dhe në kulturat bujqësore, që përfshijnë vreshta, ullinj dhe foragjere.
Banorët e prekur kërkojnë me ngut ndihmën e qeverisë për dërgimin e ekipeve të verifikimit në terren, me qëllim evidentimin e dëmeve dhe hapjen e rrugës për dëmshpërblime. Situata mbetet alarmante për shkak të çarjeve të argjinaturës së lumit, të cilat paraqesin një rrezik të madh, sidomos me parashikimet për reshje të tjera shiu qe mund të sjellin një vërshim të dytë. Banorët po kërkojnë ndërhyrje urgjente nga Bordi i Kullimit për të bllokuar këto çarje dhe për të parandaluar përkeqësimin e situatës.
Në raportet nga terreni, situata duket se po shkon drejt normalizimit, pavarësisht disa shpendëve të ngordhur, por fatmirësisht nuk janë raportuar bagëti të mbytura, falë ndihmës së ushtrisë, e cila ka ndihmuar në evakuimin e kafshëve nga zonat e rrezikuara. Disa banorë u izolu ndryshmë për shkak të përmbytjeve, por ata janë evakuuar dhe janë vendosur në zona më të sigurta. Aktualisht, situata në Hasturkas është nën monitorim të vazhdueshëm dhe banorët presin masa konkrete për riparimin e argjinaturës dhe një vlerësim të plotë të dëmeve.
