Situata klimatike në Bashkinë Durrës është e qëndrueshme, me lumenjtë Erzen dhe Ishëm që mbeten në kuota normale. Autoritetet lokale po monitorojnë vazhdimisht gjendjen e lumenjve për të siguruar që situata të mbetet nën kontroll.
Një situatë e ngjashme paraqitet edhe në Bashkinë Krujë, ku moti është kthjellët dhe nuk ka pasur problematika gjatë natës. Grupet e punës kanë dalë në terren për të vlerësuar dëmet në banesa, akse rrugore dhe toka bujqësore të prekur nga përmbytjet e fundit.
Lumi Gjole dhe Lumi Zezë janë gjithashtu në kuota normale dhe po mbahen nën monitorim të vazhdueshëm.
Edhe në Bashkinë Shijak, situata vazhdon të jetë e qetë, me një mëngjes të kthjellët dhe pa incidente gjatë natës.
Rreth 300 deri në 400 fshatra dhe vendbanime janë të lidhura ngushtë me gjendjen e lumenjve, duke bërë të nevojshme mbikëqyrjen e vazhdueshme për parandalimin e përmbytjeve të mëtejshme.
Aktualisht situata duket nën kontroll, megjithatë monitorimi dhe vlerësimi i vazhdueshëm mbeten thelbësore.
