Një aksident i rëndë ka ndodhur në verilindje të Tajlandës, ku një vinç ndërtimi u shemb mbi një tren pasagjerësh në lëvizje, duke shkaktuar vdekjen e 19 personave dhe plagosjen e dhjetëra të tjerëve.
Sipas policisë, e cila foli për agjencinë Reuters, vinçi goditi një nga vagonët e trenit, duke bërë që ai të dilte nga shinat dhe më pas të përfshihej nga flakët. Si pasojë, shumë pasagjerë mbetën të lënduar dhe u transportuan drejt spitaleve më të afërta.
Ministri i Transportit, Piphat Ratchakitprakan, konfirmoi se në tren ndodheshin 195 pasagjerë dhe se ai ishte nisur drejt provincës Ubon Ratchathani. Ai bëri të ditur se ka urdhëruar nisjen e një hetimi të plotë për të zbardhur shkaqet e aksidentit, ndërsa ekipet e emergjencës vijojnë operacionet e shpëtimit.
Vinçi ishte pjesë e punimeve për një projekt hekurudhor me shpejtësi të lartë dhe po operonte në distriktin Sikhio të provincës Nakhon Ratchasima, rreth 230 kilometra në verilindje të kryeqytetit Bangkok.
