I shkurtër dhe i përmbajtur, ashtu siç është shfaqur gjithmonë në konferencat e tij për shtyp, Xabi Alonso i dha lamtumirën tifozëve të Real Madridit me një mesazh në Instagram, ku foli për herë të parë pas largimit nga posti i trajnerit. “Ky kapitull profesional ka marrë fund dhe nuk doli ashtu si do të kishim dashur. Të trajnosësh Real Madridin ka qenë një nder dhe një përgjegjësi,” shkroi ai, për të përfunduar: “Faleminderit klubit, lojtarëve dhe mbi të gjitha tifozëve e madridistave për besimin dhe mbështetjen. Po largohem me respekt, mirënjohje dhe krenarinë që dhashë maksimumin.”
Këto janë fjalët e para të Alonso-s që nga shkarkimi i tij të hënën pasdite. Reali kishte humbur finalen e Superkupës ndaj Barcelonës dhe ajo që përflitej prej javësh — largimi i tij — u bë realitet. Megjithatë, klubi publikoi një komunikatë ku theksonte se ndarja kishte ardhur “me marrëveshje të përbashkët”.
Në deklaratën e tij, Alonso zgjodhi të mos hapte polemika: falënderoi klubin për mundësinë dhe nuk shfaqi asnjë shenjë pakënaqësie. Ai priti deri ditën pas lajmit për të reaguar, duke dhënë “versionin e tij” me qetësi dhe ton respektues.
Tani, për Xabi Alonso nis një kapitull i ri: sipas rregullave në Spanjë, ai nuk do të mund të drejtojë menjëherë një tjetër skuadër të La Ligës, por mund të trajnojë jashtë vendit, përfshirë edhe ekipe që luajnë në Champions League.
Alonso largohet pas 321 ditësh në krye dhe 34 ndeshjesh. Bilanci i tij ishte 24 fitore, 4 barazime dhe 6 humbje. Pas një starti të shkëlqyer me 10 fitore radhazi, skuadra nisi të lëkundej pas derbit në “Metropolitano” (5-2) dhe më pas u pa një kthesë e qartë, e reflektuar edhe në tensionet e momentit — si reagimi i Vinícius-it pas zëvendësimit në një ndeshje, i konsideruar si pikë kthese. Në krahasim me fillimet e Ancelotti-t, Zidane-s dhe Mourinho-s, statistikat e Alonso-s në këtë periudhë rezultojnë më të dobëta, ndërsa shifrat e tij përkojnë me ato të Flick-ut në startin e tij te Barcelona.
