Ligji për “Paqen Fiskale”, i dekretuar nga Presidenti i Republikës, Bajram Begaj, ka hasur në kundërshtime të forta nga institucione dhe organizata ndërkombëtare, përfshirë Fondin Monetar Ndërkombëtar (FMN), Dhomën Amerikane të Tregtisë dhe Bashkimin Evropian.
Këto institucione kanë ngritur shqetësime serioze lidhur me mungesën e konsultimit dhe transparencës në hartimin e ligjit, duke theksuar se “Paqja Fiskale” mund të dëmtojë përparimin e arritur në administrimin e tatimeve dhe të rrezikojë qëndrueshmërinë fiskale të vendit.
Dekreti nr. 21 është firmosur në Tiranë më 12 janar 2026, në mbështetje të neneve 84, pika 1 dhe 93 të Kushtetutës së Shqipërisë. Ligji synon rregullimin e marrëdhënieve financiare dhe fiskale mes individëve dhe shtetit, duke parashikuar lehtësi për subjektet që kanë detyrime të prapambetura ndaj administratës shtetërore.
Kritikat e FMN-së dhe Dhomës Amerikane të Tregtisë pasqyrojnë një shqetësim më të gjerë mbi politikat fiskale dhe menaxhimin e financave publike në Shqipëri. Sipas tyre, zbatimi i ligjeve të tilla kërkon standarde të larta transparence, konsultim gjithëpërfshirës dhe angazhim qytetar, për të garantuar stabilitet ekonomik dhe një klimë të sigurt për investitorët dhe qytetarët.
