Autoritetet suedeze kanë bërë konfiskimin më të madh të lëndëve narkotike në historinë e vendit, pasi kanë sekuestruar rreth tre ton kokainë në portin e Helsingborgut, në jugperëndim të Suedisë.
Sipas të përditshmes lokale Sydsvenskan, droga u gjet e fshehur në një kontejner që kishte mbërritur nga Amerika Latine. Prokurori Mans Biorklund tha për Dagens Nyheter se deri tani nuk ka persona të arrestuar në lidhje me rastin dhe hetimet vijojnë për të zbuluar rrjetet e përfshira.
Ky operacion vjen vetëm pak orë pasi autoritetet spanjolle raportuan sekuestrimin më të madh të kokainës në det të hapur, ku një anije që lundronte nga Brazili drejt Evropës u kap me afro 10 ton lëndë narkotike, të fshehura në një ngarkesë kripe.
Hetimet ndërkombëtare pritet të bashkërendohen pasi autoritetet dyshojnë se ngarkesat mund të jenë pjesë e të njëjtit zinxhir të trafikut global të kokainës.
